01 ta' April 2007
Dawn boloh?

Franica Pulis

Hi ħajja ta’ ‘ġenn’ għal 10 ġimgħat għal Dwal Ġodda, grupp ta’ voluntiera ħafna minnhom minn Ħal Għargħur li jaħdmu żewġ produzzjonijiet teatrali fis-sena b’li jmiss iġġib l-isem Bluha? Fil-fatt it-titlu, minbarra li hu referenza għal-1 ta’ April, hu ċajta li jgħaddu bejniethom minħabba li spiss jingħaddulhom kummenti li qed jagħmlu ġennata għal ħin li jqattgħu fil-provi mingħajr ma jieħdu sold.
Żort il-grupp daqs ġimgħa ilu waqt il-provi. Dħalt inkiss inkiss. Fuq naħa nara palk armat modern u mdawwal bil-kor imferrex fuq it-taraġ u tlitt ġuvintur imsallbin. In-naħa l-oħra nara raġel qsajjar fuq il-palk fiss tas-sala parrokkjali jħanxar id-direzzjonijiet lill-atturi f’aċċent qawwi Għargħuriż.
Ir-raġel hu Martin Gauci, direttur u kittieb ta’ wħud mix-xogħlijiet li jtella’ l-grupp, bniedem li ilu fi Dwal Ġodda mill-bidu tiegħu mindu kellu 18-il sena. Dik il-ħabta kien kiteb u dderieġa dramm li ġie klassifikat 21, dramm li hu stess ma setax jidħol jara minħabba ċ-ċensura.
“Bdejna mill-faqar ta’ farsa u vaudeville. Imbagħad bdejna mmissu ma’ kittieba ta’ stoffa bħal Ebejer, Pirandello u oħrajn. Kif bqajna niżviluppaw fid-drammi li ntellgħu matul is-sena, bdejna niżviluppaw ukoll fid-drammi tal-Ġimgħa l-Kbira,” spjega d-direttur.
Fil-pront taqbeż bintu Martha tfiehem li huma permezz tat-teatru jisfidaw il-ħsibijiet u l-ideat tan-nies u b’hekk jisperaw li ma jifqux jistaqsu. “Hu mezz ta’ kif tiskopri lilek innifsek, lil sħabek u l-udjenza; kif ukoll emozzjonijiet oħra li s-soltu ma tesplorax.
Fid-dramm imissu ma’ bosta temi jaħarqu li mhux l-ewwel darba jinkinsu taħt it-tapit fosthom kwistjonijiet ta’ politka, fanatiżmu tal-każini u l-partiti u anki l-karità bil-mod ta’ kif saret ssir f’Malta.
“Ħażin għalikom: tinqdew bit-tbatija u d-dgħufija ta’ ħaddiehor biex tidhru sbieħ intom, jew biex tħaxxnu l-but tagħkom… Lill-proxxmu tiegħek muġugħ: indukrah, għinu fis-skiet!” jgħid il-karattru tal-Madonna ftit qabel ma jissallab binha.
Id-dramm hu soċjali għax imiss ma’ temi kurrenti li għaddej minnhom il-pajjiż. It-titlu nnifsu hu botta indiretta għal ħajja ta’ bluha u frugħa li sirna ngħixu. Ħajja li nagħmel kollox minbarra dak li verament hu importanti. “Soċjali b’saqajna ma’ l-art,” spjegat Martha. Saħansitra jagħmlu żmien jifhmu u jgħixu f’sitwazzjonijiet differenti bħall-Open Centre tal-Marsa jew iċ-Ċentru ta’ San Blas. Fil-fatt Martin hu persuna li jħobb ikun man-nies u jixrob ‘l-università tal-ħajja’. Hu persuna li jemmen li “meta toħroġ miċ-ċentru u ssir umli jirnexxilek tegħleb il-karattru”.
Fuq l-istess idea Martha kompliet tgħid, “L-ewwel tqaxxar il-maskri kollha. Tiskopri dawk li tafx bihom imbagħad ixxid il-karattru.”

Bluha? qed tittella’ llum wara nofsinhar fil-misraħ ta’ Ħal Għargħur fil-5pm.