18 ta' Frar 2007
L-għeruq u l-floating voter

Nirreferi għall-intervista li Julia Farrugia għamlet lis-Segretarju Ġenerali tal-PN Joe Saliba li dehret il-Ħadd li għadda.
Minn din l-intervista jidher ċar li Saliba qed jibbaża kollox fuq il-floating voters. Hu vera li dawn jagħmlu differenza kbira, għalkemm iċ-ċifra ta’ 25 fil-mija naraha ftit esaġerata. Iżda lanqas ma wieħed għandu jinsa lill-għeruq.
Qed ngħid dan għax tinkwetani waħda mit-tweġibiet ta’ Saliba. Meta l-ġurnalista staqsietu jinkwetahx il-fatt li jkollu kritika għall-partit minn nies li tradizzjonalment jivvutaw lill-PN, Saliba wieġeb li dan ma jinkwetahx.
“Ma jinkwetanix x’jaħseb min mhux magħna aħseb u ara!” qal Saliba.
Din it-tweġiba tinftiehem li dawk “ta’ magħna” se jkomplu jittieħdu for granted!

Roev Zahra
Ħal-Għaxaq