10 ta' Diċembru 2006
Kif ir-rapport falz spiċċa għand Gonzi

Jannar 2004
Zoodsma tas-Simed isostni li jeħtieġ jagħmlu xi ħaġa. Jgħid: “Agħtuni t-telefon u l-email ta’ l-investigatur privat.” L-eks ministru Nazzjonalista l-avukat Joe Fenech, li qed jirrappreżenta lis-Simed, isir jaf għall-ewwel darba li s-Simed ingaġġaw investigatur privat.

Frar 2004
L-avukat Fenech infurmat li l-investigatur ipprepara t-tieni rapport fuq il-kuntratt Mater Dei.

7 ta’ Frar 2004
Eddie Fenech Adami jħabbar ir-riżenja tiegħu minn Kap tal-PN.

25 ta’ Frar 2004
Joe Zahra jibgħat ir-rapport bl-email lil Zoodsma. Din hi l-ewwel darba li Zahra jsemmi lil Bastjan Dalli, ħu l-ministru John Dalli, li f’dan iż-żmien hu mpenjat fit-tiġrija għall-kap tal-PN.

Frar 2004
Lejn l-aħħar tax-xahar issir laqgħa fil-lukanda Corinthia bejn Joe Zahra, Frank Farrugia, Raphael Fenech Adami u Zoodsma

23 ta’ Marzu 2004
Lawrence Gonzi jinħatar Prim Ministru.

April 2004
Joe Fenech jidħol l-isptar għal operazzjoni.

Mejju 2004
Raphael Fenech Adami jmur Kastilja bir-rapport ta’ Joe Zahra issiġġillat f’envelop u jħallih ma xi segretarju personali tal-Prim Ministru.

Ġunju 2004
Fenech jgħid lil Zahra li għandhom bżonn iktar dettalji u provi dwar il-każ Mater Dei biex jgħadduhom lill-Prim Ministru.

9 ta’ Ġunju 2004
It-“Times” toħroġ bl-istorja dwar ix-xiri tal-biljetti ta’ l-ajru mill-Ministeru ta’ l-Affarijiet Barranin immexxi minn John Dalli mingħand kumpanija tal-qraba tiegħu. Filgħaxija, kontra kull tradizzjoni, l-istazzjon ta’ l-istat ‘PBS’ ixandar l-istorja tat-“Times”.

10 ta’ Ġunju 2004
Dalli jibgħat email lil Gonzi jgħidlu li hu kkonċernat “minn fejn oriġinaw l-attakki.”

11 ta’ Ġunju 2004
Il-Prim Ministru jiltaqa’ ma’ Joe Fenech, Raphael Fenech Adami, Frank Farrugia u s-segretarju privat ta’ Gonzi, Edgar Galea Curmi. Fenech juri lil Gonzi t-tieni rapport ta’ Zahra mħejji fi Frar 2004.

12 ta’ Ġunju 2004
Issir l-elezzjoni għall-Parlament Ewropew.

29 ta’ Ġunju 2004
Bondiplus jiddiskuti ‘l-iskandli’ ta’ John Dalli. Preżenti fl-istudjo John Dalli u Leo Brincat.

3 ta’ Lulju 2004
John Dalli jirriżenja. Il-Prim Ministru jaċċetta r-riżenja iżda jiskolpa lil Dalli mill-każ tal-vapuri Iranjani u jieħu l-parir ta’ Dalli biex il-każ tal-biljetti ta’ l-ajru jgħaddih f’idejn l-Awditur Ġenerali. Jibqa’ misteru għalfejn Dalli kellu jirriżenja.

7 ta’ Lulju 2004
Gonzi jgħid lil Fenech biex jieħu r-rapport ta’ Zahra għand il-pulizija. Il-Prim Minstru jirċievi ittra mingħand Simed biex jinvestiga l-allegazzjonijiet.

15 ta’ Lulju 2004
Gonzi jsejjaħ f’Kastilja lil John Rizzo, il-Kummissarju tal-Pulizija u jitolbu jinvestiga l-allegazzjonijiet.

19 ta’ Lulju 2004
Rizzo jsejjaħ lil Zahra d-Depot għall-interrogazzjoni. Fl-istess ġurnata Edgar Galea Curmi jikteb lil Fenech u Zoodsma biex javżahom li l-Prim Ministru rrefera r-rapport lill-Pulizija.

Awissu 2004
Zahra jammetti li ivvinta l-akkużi fir-rapport u jitressaq il-Qorti mixli li vvinta allegazzjonijiet foloz bl-iskop li jħammeġ lil John Dalli u jitfa’ f’dawl ikrah l-għoti tal-kuntratt għat-tagħmir mediku f’Mater Dei.

30 ta’ Novembru 2006
Joe Zahra jinstab ħati mill-Qorti u jkun kundannat sentejn ħabs u interdettjat għal ħames snin.

2 ta’ Diċembru 2006
John Dalli pubblikament jitlob lill-Partit Nazzjonalista biex isewwi l-ħsara li saret fil-konfront tiegħu minħabba r-rapport ta’ Joe Zahra. Hu jsostni li r-rapport kellu piż fuq il-pressjoni li saritlu minn esponenti fil-PN biex jirriżenja fl-2004.

4 ta’ Diċembru 2006
Il-Prim Ministru Lawrence Gonzi jsostni li r-rapport falz ta’ Zahra ma kellu l-ebda piż fuq ir-riżenja ta’ John Dalli iżda jibqa’ ma jispjegax għaliex hu aċċetta r-riżenja tal-Ministru.